Feature

ଧନ୍ୱନ୍ତରି ଜୟନ୍ତୀରେ ଗହଣା ଦୋକାନୀ ଗ୍ରାହକଙ୍କୁ ଲୋଭ ଦେଖାଇ କରୁଛନ୍ତି କୋଟିକୋଟି ଟଙ୍କାର ବ୍ୟବସାୟ

କପିଳାସ କୁମାର ବେହେରାଙ୍କ ରିପୋର୍ଟ

ସାଧାରଣରେ ବିଶ୍ୱାସ କରାଯାଏ କି ଧନତେରାସ ଦିନ ସୁନା ଆଣିଲେ ଘରକୁ ଲକ୍ଷ୍ମୀଙ୍କ ଆଗମନ ହୋଇଥାଏ ଏବଂ ସୁଖ ସମୃଦ୍ଧି ମଧ୍ୟ ବଢିଥାଏ । ଏହି ପରିପ୍ରେକ୍ଷୀରେ ପ୍ରତି ବର୍ଷ ପରି ଏ ବର୍ଷ ମଧ୍ୟ ଧନତେରାସ୍ରେ ଗହଣା ଦୋକାନ ଗୁଡିକରେ ଭିଡ ଦେଖିବାକୁ ମିଳିଥିଲା । କେବଳ ବଡ ଗହଣା ସୋ-ରୁମ ନୁହେଁ ଛୋଟଛୋଟ ଦୋକାନମାନଙ୍କରେ ମଧ୍ୟ ଗ୍ରାହକଙ୍କ ଭିଡ ପରିଲକ୍ଷିତ ହୋଇଥିଲା ।

କିନ୍ତୁ ପୁରାଣ କହେ ଅଲଗା କଥା । କାର୍ତିକ କୃର୍ଷ୍ଣ ତ୍ରୟୋଦଶୀ ହେଉଛି ଧନ୍ୱନ୍ତରି ଦେବୀଙ୍କ ଆବିର୍ଭାବ ଦିବସ । ଧନ୍ୱନ୍ତରି ହେଉଛନ୍ତି ବୈଦିକ ଦେବତା । ପ୍ରସିଦ୍ଦ ପତ୍ରିକା ପୌରୁଷରେ ପ୍ରକାଶିତ ଏକ ଆଲେଖ୍ୟ ଅନୁଯାୟୀ ଏହି ନାମ ସହିତ ଅଳଙ୍କାର ରୁପକ ଧନର କୌଣସି ସମ୍ପର୍କ ନାହିଁ । ଧ୍ୱନନ୍ତରି ଶବ୍ଦର ମୂଳ ଶବ୍ଦ ହେଉଛି ଧନ୍ୱ-ଅନ୍ତ-ର-ଇ । ଧନ୍ୱର ଆକ୍ଷରିକ ଅର୍ଥ ମରୁଭୂମି ବୋଲି ପଣ୍ଡିତ ଗୋପୀନାଥ ନନ୍ଦ ଶର୍ମାଙ୍କ ଶବ୍ଦ ଅଭିଧାନରେ ଉଲ୍ଲେଖ ଅଛି । ମରୁଭୂମିର ଅନ୍ତ ପରେ ସମୁଦ୍ରରୁ ଉତଥିତ ହୋଇଥିବାରୁ ତାଙ୍କର ନାମ ଧନ୍ୱନ୍ତରି । ଧନ ସହିତ ଧନ୍ୱନ୍ତରିର କୌଣସି ସମ୍ପର୍କ ନାହିଁ । ତେବେ ପୂରାଣ ଏହା ମଧ୍ୟ ସୂଚାଏ ଯେ ଧନ୍ୱନ୍ତରିଙ୍କ ପୃଥିବୀରେ ଧରାବତରଣ ମଣିଷର ସ୍ୱାସ୍ଥ୍ୟ ରୂପକ ଧନର ସୁରକ୍ଷା ପାଇଁ । ସୁନା, ରୁପା, ହୀରା ଆଦି ଐତିହ୍ୟ ସୁଖ ଓ ବିଳାସ ସହ ତାର କୌଣସି ସମ୍ପର୍କ ନାହିଁ । କିନ୍ତୁ ଆମେ ଧନ୍ୱନ୍ତରିଙ୍କ ଆବିର୍ଭାବ ଦିବସ କାର୍ତିକ କୃଷ୍ଣ ତ୍ରୟୋଦଶୀକୁ ଧନ୍ୱନ୍ତରି ତ୍ରୟୋଦଶୀଭାବେ ପାଳନ ନକରି ସେହି ଦିନକୁ ଧନତେରାସ ବା ଧନତ୍ରୟୋଦଶୀ ଭାବରେ ପାଳନ କରିଥାଉ । ଧନ ସାଇତିବା ପାଇଁ ଏହି ଦିନକୁ ଆମେ ବିଭିନ୍ନ ସୁନା ରୁପା ଦୋକାନରେ ଭିଡ ଜମାଇ ଥାଉ । ଏହି ଦିନ ସୁନା ରୁପା ଆଦି ଗହଣା ନକିଣି ନିଜର ସ୍ୱାସ୍ଥ୍ୟଧନକୁ ସୁରକ୍ଷା ଦେବା ଦିଗରେ ଧ୍ୟାନ ଦେବା ଦରକାର ।
ଧନ୍ୱନ୍ତରିଙ୍କ ନାମରେ ଧନତେରସ ପାଳନ ସୁନା, ରୁପା ଦୋକାନୀଙ୍କ ଏକ ଚତୁର ବ୍ୟବସାୟୀକ ଫନ୍ଦି । ଏହି ଦିନ ସୁନା କିଣିଲେ ଘରକୁ ଲକ୍ଷ୍ମୀ ଆସନ୍ତି ବୋଲି କହି ବ୍ୟବସାୟୀମାନେ ନିଜ ଜାଲରେ ଲୋକଙ୍କୁ ଛନ୍ଦି କୋଟିକୋଟି ଟଙ୍କାର ବେପାର କରି ଲାଭବାନ ହେଉଛନ୍ତି । ଏହି ଆଧାରରେ ସୁନା କିଣିବା ପାଇଁ ଲୋକେ ବର୍ଷ ତମାମ ଅପେକ୍ଷା କରି ରହିଥାନ୍ତି ଏହି ଦିନକୁ । ଏବର୍ଷ ମଧ୍ୟ ଭୁବନେଶ୍ୱର, କଟକ, ପୁରୀ, ସମ୍ବଲପୁର, ବାଲେଶ୍ୱର, ବାରିପଦା, ବ୍ରହ୍ମପୁର, ଜୟପୁର, ରାଉରକେଲା, ଅନୁଗୁଳ ଓ ଢେଙ୍କାନାଳ ପରି ପ୍ରମୁଖ ସହରର ଗହଣା ଦୋକାନ ଗୁଡିକରେ ଲାଗିଥିଲା ଭିଡ । ସକାଳରୁ ଭିଡ ଆରମ୍ଭ ହୋଇ ବିଳମ୍ବ ରାତ୍ରୀ ପର୍ଯ୍ୟନ୍ତ ଚାଲିଥିଲା କିଣା ବିକା । ସାଧାରଣ ଦିନ ଗୁଡିକରେ ଯେଉଁ ବିକ୍ରି ହୋଇଥାଏ ତାହା ତୁଳନାରେ ଏହି ଦିନ ପାଖାପାଖି ୧୦-୧୫ ଗୁଣ ଅଧିକ ସୁନା ରୁପା ବିକ୍ରି ହୋଇଥାଏ । ସୁନା ରୁପା ଦୋକାନୀ ମାନେ ଗ୍ରାହକଙ୍କୁ ଅଧିକରୁ ଅଧିକ ଆକର୍ଷଣୀୟ ଅଫରର ଆଳଦେଖାଇ ଓ ଆଗାମୀ ଦିନରେ ଏହା ମିଳିବ ନାହିଁର ଆଳ ଦେଖାଇ ଆକୃଷ୍ଟ କରିଥାନ୍ତି । ଏହା ହିଁ ସୁନା ରୁପା ବିକ୍ରି ବୃଦ୍ଧିର କାରଣ ବୋଲି କୁହାଯାଉଛି ।

ଭୁବନେଶ୍ୱର ଏକ ପ୍ରମୁଖ ଗହଣା ବ୍ୟବସାୟୀ କହନ୍ତି ଆଗକୁ ବାହାଘର ସିଜିନକୁ ଆଖିରେ ରଖି ଗ୍ରାହକ ମାନେ ଅଧରକ ଓଜନର ହଗଣା କିଣିଛନ୍ତି । ଏବଂ ଅନ୍ୟମାନେ ଦୈନିକ ବ୍ୟବହାର ପାଇଁ ହାଲୁକା ଓଜନର ଗହଣା କିଣିଛନ୍ତି । ଖେମଜି ଜୁଏଲର୍ସ ଜିଏମ କହନ୍ତି ଗତବର୍ଷ ଗତବର୍ଷ ତୁଳନାରେ ଏ ବର୍ଷ ୧୦ ରୁ ୧୫ ପ୍ରତିଶତ ଅଧିକ ସୁନା ଗହଣା ବିକ୍ରି ହୋଇଥିବା ଅନୁମାନ କରାଯାଉଛି ।

ସୂଚନା ଅନୁସାରେ ଗତବର୍ଷ ଠାରୁ ଚଳିତ ବର୍ଷରେ ୨ କ୍ୟାରେଟ ଓ ୨୪ କ୍ୟାରେଟ ସୁନା ଓ ରୁପାର ମୂଲ୍ୟ ଅଧିକ ଥିଲେ ମଧ୍ୟ ଏହି ଦିନ ସୁନା କିଣିବା ଗ୍ରାହକ ମାନଙ୍କର ଏକ ଟ୍ରେଣ୍ଡରେ ପରିଣତ ହୋଇଯାଇଛି ।

ଏ ବାବଦରେ ବିଶିଷ୍ଟ ସ୍ତମ୍ଭକାର ଅସିତ ମହାନ୍ତିଙ୍କ ମତ ହେଉଛି କାର୍ତିକ କୃର୍ଷ୍ଣ ତ୍ରୟୋଦଶୀ ଧନ ତେରସ ପାଇଁ ସୁନା ଦୋକାନ ଗୁଡିକରେ ଭିଡ ଜମେ କିନ୍ତୁ ଏହି ଦିନଟି ମୂଲତଃ ଯେ ଧନ୍ୱନ୍ତରି ଜୟନ୍ତୀ ସେ କଥା ଆମେ ଭୁଲି ଯାଇଛୁ ।
ଏ ବାବଦରେ ବରିଷ୍ଠ ସାମ୍ବାଦିକ ଦେବେନ୍ଦ୍ର ପୃଷ୍ଟି କହନ୍ତି ଧନ୍ୱନ୍ତରି ଜୟନ୍ତୀକୁ ଧନତେରାସ କହି ଧନଲକ୍ଷ୍ମୀଙ୍କ ସହ ଯୋଡି ଦେଇଛନ୍ତି ସୁନା ବେପାରୀ ।

Click to comment

Latest Odisha News is an Odisha based English News portal. It provides latest information on happenings of state.

Copyright © 2018 All rights reserved to Latest Odisha News.

To Top